"Awal" ed "ameslay"

Sslam n Ṛebbi fell-awen,

Deg leqdic ay ntteg i lmend n wesnerni n yiles amaziγ, yessekf fell-aγ ad d-nesnulfu imeslayen imaynuten, maca yessekf daγen ad nesseqεed imeslayen yellan i wakk-n ur rewwint tγawsiwin, ladγa deg way-n yerzan tussna. Ay-a d aḥric deg way-n umi ttinin "asseqεed n yiles" (aménagement linguistique).

"Awal", deg teqbaylit ed deg tmaziγt s umata, yesεa sin n yinumak (lmeεnat):

1- d assiwel, d ay-n akk ay d-nettini mi ara nessawal (parole). Γef umedya (lemtel), ad d-nini "yegzem-as awal", anamek-nnes yiwen yella yessawal, sakk-in wayeḍ yegzem-as "assiwel"-nni, ur t-yejji ad ikemmel awal neγ "assiwel".

2- awal [mot] d yal yiwen seg yifedisen-nni ay yes d-nbennu tifyar (phrases). Γef umedya (lemtel): deg "Tufa tqabact afus-nnes",

"tufa" d awal (d amyag "af"), "tqabact" d awal (taqabact), "afus" d awal, yerna ula d "-nnes" d awal (d amqim n wayla).

"Awal" yezmer ad yesεu aṭas n yinumak niḍen ay nezmer ad ten-id-nessuqqel s tefṛensist s "expression" (γef umedya, "azul fell-awen" d awal, γas ma llan deg-s tlata n "wawalen"), neγ diγ "propos" (ad tesleḍ yir awal ...), atg.

D acu kan, deg tesnilsit (linguistique), ladγa tagara-a, mi akk-a ay tebda tmaziγt tkeccem deg yinurar yemgerraden n tmussni, yessekf ad neg amgerrad gar sin-a n yinumak (lmeεnat).

Deg kra n tmiwa n Tmurt n Leqbayel, sseqdacen "awal" (parole) ed "ameslay" (parole). Aneggaru-a yekka-d seg wemyag (verbe) "mmeslay", anamek-nnes "ssiwel, hdeṛ".

Ihi, ad d-nini "yegzem-as awal", maca, a win yufan, ad d-nini ""aselway" d ameslay amaynut".

Tanemmirt

Čč Ḍḍ Ğğ Ḥḥ Γ γ
Ṛ ṛ Ṣ ṣ̣ Ṭ̣ṭ Ẓ ẓ Σ ε